डीएसपीले गृहमन्त्रीसँग भने, 'मलाई जोगाउनुहोस'

धादिङ, चैत्र १ - बलात्कारको घटनामा सार्वजनिक मुद्दा दर्ता गराएर विवादमा आएका यहाँका प्रहरी प्रमुख (डिएसपी) आशोक सिंहले शनिवार गृहमन्त्रीसँग आफू अप्ठ्यारोमा परेको गुनासो गरेका छन् ।

एमाले क्षेत्रिय अधिवेशनमा सहभागी हुन सल्यानकोट-८ आएका गृहमन्त्री बामदेव गौतमलाई भेटी उनले आफू कारवाहीमा परेकाले छुट्कारा पाउनुपर्ने अनुरोध गरेका हुन् । कार्यक्रमको उद्घाटन गरेर हेलिकप्टरमा राजधानी फर्केन लागेका गृहमन्त्रीलाई सिंहले भने, 'हेर्डक्वाटरले स्पष्टीकरण सोधेर कारवाही सुरु गरेको छ, फुकुवा गरिदिनु पर्‍यो ।' प्रमुख जिल्ला अधिकारी, जिल्लाका अन्य सुरक्षा प्रमुखहरु, एमाले जिल्ला अध्यक्ष खेम लोहनी र पत्रकारसँगै रहेको बेला गृहमन्त्रीसँग उनले गुनासो गरेका थिए । उनको गुनासोपछि अध्यक्ष लोहनीले प्रहरीबाट गल्ती नभएको भन्दै गृहमन्त्रीलाई आश्वस्त पारेका एक सुरक्षा अधिकारीले बताए । 'डीएसपीले गाह्रो भयो, कारवाही हुनबाट जोगाउनु पर्‍यो भनेर गृहमन्त्रीसँग बिन्ती गरे', कुराकानी सुनेका एक पत्रकारले भने ।

पीडितको स्वास्थ्य परीक्षण रिपोर्ट लुकाएर प्रहरी, पीडक र पीडितको आफन्तको मिलेमतोमा बलात्कारको घटना ढाकछोप भएको थियो । सल्यानटार गाविसकी २७ वर्षीय  सुस्तमनस्थिति भएकी युवतीमाथि भएको बलात्कारको स्वास्थ्य परीक्षण रिपोर्ट प्रहरी कार्यालयबाटै गायब भएको समाचार कान्तिपुर दैनिकमा प्रकाशित भएको थियो ।

समाचार प्रकाशित भएपछि क्षेत्रिय प्रहरी कार्यालयले छानविन सुरु गरेर कारवाही अघि बढाएको छ । कारवाहीका क्रममा प्रहरी निरीक्षक बालकृष्ण पोखरेल र मुद्दा इन्जार्ज मनिराम भट्ट क्षेत्र तानिएका छन् भने अस्पतालमा कार्यरत प्रहरीलाई घर बिदामा पठाइएको छ । प्रहरीले बलात्कारको घटना लुकाउने गरेको सार्वजनिक भएपनि मानवअधिकारबादी संघसंस्थाले अध्ययन थालेका छन् ।

यसअघि पनि सिंहले जिल्लास्थित राजनैतिक दलका नेताहरु, सभासद्, व्यवसायी, प्रमुख जिल्ला अधिकारी, अन्य कार्यालय प्रमुख, संचारकर्मीहरुसँग हारगुहार गर्दै आएका थिए । बलात्कारको घटनामा सार्वजनिक मुद्दा दर्ता भएपछि आरोपी श्यामकुमार श्रेष्ठ धरौटीमा रिहा भएका छन् । प्रहरी र अधिकारकर्मीले छानविन सुरु गरेको जनाएपनि अहिलेसम्म प्रतिवेदन सार्वजनिक गरेका छैनन् । प्रतिवेदन सार्वजनिक गर्ने दावी भने गरिएको छ ।