अक्षयकुमारले बनाए ठमेल ठप्प, विवादमा तानिँदै चलचित्रको छायांकन

काठमाडौं, बैशाख २२– कडा सुरक्षाकाबीच राजधानीको ठमेलमा सोमबार दिउँसो भारतीय अभिनेता अक्षयकुमार अभिनित एक चलचित्रको छायांकन भएको छ । ठमेलको मण्डलास्ट्रिट परिसरमा भएको सो चलचित्र छायांकनको क्रममा सर्वसाधारणलाई आवागमनमा रोक लगाइएको थियो । यस्तै समाचार संकलनका लागि पुगेका पत्रकारलाई समेत माथिको आदेश भन्दै दर्जनौंको संख्यामा अक्षयको सुरक्षामा खटिएका प्राइभेट सुरक्षा कम्पनी जीफोर्स र नेपाल प्रहरीको टोलीले रोक लगाएको थियो । ‘

बेबी’ नामको चलचित्र छायांकनको लागि सक्षयकुमारसहितको फिल्म निर्माण युनिट नेपाल आएको बताइन्छ । उनी चारदिनयता राजधानीको होटल हायातमा बसिरहेका छन् । फिल्मको नाम बेबी भनिएपनि नेपालमा सुटिङको लागि आवाश्यक सामग्रीको भन्सार छुटको लागि निवेदन माग्दा ‘बसन्ती’ भनेर उल्लेख गरिएको नेपाल चलचित्र विकास बोर्डले जनाएको छ ।

चलचित्र विकास बोर्डका अध्यक्ष धमेन्द्र मरबैताले भारतबाट सिनेमाको छायांकन लागि आवश्यक सामानहरुको भन्सार छुटका लागि निवेदन आएको जानकारी दिँदै सिनेमाको नाम ‘बसन्ती’ भनी दर्ता गरिएको बताए । यसैबीच छायांकन हुँदै गरेको अक्षय अभिनित चलचित्र यहाँ विवादमा तानिएको छ । सो चलचित्रले नेपालबारे अफबाह फैलाउन त्रिभुवन अन्तराष्टिय विमानस्थलमा छायांकन गर्ने तयारी भएको सार्वजनिक भएपछि विवादमा तानिएको हो । छायांकन टोलीले स्वदेश फर्कने क्रममा त्रिभुवन विमानस्थलको भिडियो खिचेर त्यसमा नेपालको विमानस्थल झुर भएको भन्दै अनावश्यक प्रचार गर्न लागिएको बताइन्छ ।

यसले नेपालको राष्ट्रिय स्वाभिमान र प्रतिष्ठामा आँच आउने भन्दै विमानस्थलका कर्मचारी र सरकारी अधिकारीहरुले चिन्ता व्यक्त गरेका छन् । स्मरण रहोस् सो फिल्मको सुटिङ विमानस्थलमा छायांकन गर्न अनुमति कहाँबाट कसले दिएको हो त्यो े थाहा नपाएको विमानस्थल अधिकारीहरुले बताएका छन् । नेपालको इज्जतसँग जोडिएको सवालमा सरकार गम्भीर हुनुपर्ने विमानस्थलमा अधिकारीहरुले बताएका छन् । यसअघि चलचित्रको छायांकन हायात होटल परिसरमा भएको थियो भने भक्तपुर दरबार स्क्वायरमा पनि गरिने बताइएको छ । चलचित्रमा अक्षयको मुख्य भूमिकार रहेको बुझिएको छ ।